Bar 2
1Anidagua bialu hemagola Anduane Homogohanda ko bialu harimiyagua pani nalimulo ngule lenego henene tagira pelaya. Ibugua bi ogoni Isaraele wali agalinaga agali haguane hearuhondobi kini hearuhondobi agali timbuni bu hearuhondobi Isaraele wali agali bu hearuhondobi Yuda wali agaliruhondobi bi lo wini. 2Mosesenaga bimana lowini ngagome ledadaguaore ina genda timbuniore mo ya henego kema. Ainde genda timbuni Yarusalemeha anda ibiyago timbuniore dindi maruha genda ogonibi naibini. 3Ina mo ko halu inanenaga waneiginirunaga tingini inaneme narimagoni ndobe. ▼▼(2.3)Mbirale uruni Babilono amime ibalu Yarusaleme ho hagira biyagola wali agali tanoha bu hearu tomo nolene mbira nawiore howa gari timbuni hene Dugu 2.20 ngago de handabe.
4Anduane Homogohanda ina bo taliatagi howa wali agali hameigini tara ina baba handa a̱i̱na̱i̱ kaware howa ina mege bialu ina ko ngubiore tara handale haga bu hearunaga hongo andaneha heledagoni. 5Iname inanaga Anduane Homogo kagohondo mana ko bialu ibunaga bi hale nahe harima. Anidagua birimagonaga Anduane Homogohanda ina mo heyaha ndo ina bopeore henego kema.6Anduane Homogo inanaga Ngode Datagaliwabe ibu bayale tigabiore kago helowa inabi inanaga mamali henedaru tibi bibahendeore mana ko inane bialu harimagonaga genda yu kemagoni. 7Anduane Homogo ibunime bule lalu lo winidaguaore bialu ina pani nolene mo ngiya. 8Anigo ainde iname mini beregedalu ibuni karia dai bialu inanaga mini ko wu harimadaru wahai halu dai buluma̱ya ina mo hongo habe lolene wiago nale harima. 9Ina ibunaga bi layago hale naheore howa ina ibunaga mana lo ngagobi talia nabi harima. Anidagua dege Ngode Datagaliwabehanda lalu, Tígua mana baya bulene ngago nabi harimiyagua tíha mo ko holene ibilolebero, lalu bi lo wiyago ngola helo ibugua uruni inaha ibilaya.
11Ngode Datagaliwabe í̠ore Anduane Homogo Isaraele wali agalinaga Ngode Datagaliwabeore kegoni. Í̠naga hongo timbuniore ngegomebi í̠naga biabe timbuniore bialu agalime nabiaganeale birigomebi í̠naga wali agali Iyibi dindi wahalu haru tagira pialu oali haru ibirigoni. Í̠naga hongo timbuni mo walia harigome í̠naga mini timbuniore mini lene henego áyu haabo ke. 12Anduane Homogo inanaga Ngode Datagaliwabe-o iname mana ko timbuni bialu harima. Ina wali agali ko kema. Iname í̠naga mana lo wini ngaru aria mbiraore hangubi mbira talialu nabiore harima. 13Ainde ina baba keba ho haabo holeni nahabe. Í̠nime ina dindi tara tara wiaruha pugu pugu buluma̱ya bo taliatogo larigola ainde ina dege dombeneha mbira mbira hangu haga haga bidemagoni ndobe. 14Anduane Homogo-o í̠naga mini timbuni mini leneore kego manda bialu ina biamogo bibe. Ainde agali ina dindi ogoha garabaya bu yalu ibiyaru tibi nde áyu ina baba turu haga bu helo helabe larama. 15Wali agali tara tara karume í̠ inanaga Ngode Datagaliwabeore howa ina Isaraele wali agali í̠ninaga helo í̠nime dababagiho heleneoreda lo manda biai helo ani bibe larama.
16Anduane Homogo í̠ni dahuliya andagaha howa de handadali halu ina de handalu mitangi habe larama. Inanaga bi laramagoni hale habe. 17Í̠naga dengala halu ina de handa. Ai wali agali homalu humbirini andagaha pu karu tigua bu he̱ lolene lone mibe nahe kago ai tigua í̠hondo bi turubi langulenebi í̠naga mana tigabi ngeru latagi holenebi nakarulapeore. 18Wali agali homa nabi karume dege lolene karulape. Ti tandaga timbuni nalu howabi ti bo hengeda hene hongo naheore howabi ti hina garime tungulo mibehe de mborere bu howabi harugo lowa tigua í̠ni Anduane Homogoore kegonaga mini yaraga halu mana bayaleore í̠na biaga ngego latagi halu holebira.
19Anduane Homogo inanaga Ngode Datagaliwabe-o í̠na inaore dara halu biamogo bibelonaga bi lalu kema. Ina mamalirumebi inanaga kinirumebi mana bayale bialu henego mitangi bibe lalu ndo larama. 20Ainde bamba í̠naga bi manalatagi halu mbiwia haga hearuhondo bi lamirigola tigua latagi halu hene. Tigua lalu 21Anduane Homogohanda lalu, Tí Babilononaga kini kago andaneha halu ibugua tí handaya ho helalimu. Ani howa dindi ina tínaga mamaliruhondo mirugoha ema nabi hendore halimu. b 22Anigo ainde tígua bi i̱na larogo mo wahowa Babilononaga kini kago andaneha holene manga harimiyagua 23nde Yuda dindiha tano bu ngaru bibahendehabi Yarusaleme tano ngagohabi wali agali lenego mbira naholebiraore. Wali agalinaga bu miniha turu ho hagabi wali agali dabu bialu howa tomo bayaleru nalu turu haga bu hagane ngarubi bibahende mo wahai halu ereba helolebero. Ani berogola dindi ogo bibahendeha labu dindi hangu wulebira. Dindi ogoha dabulu labu wialu wali agali lenego mbira naholebira.
24Agali Anduane Homogonaga bi mana latagi halu mbiwia haga bu hearume bi ogonidagua layagoyu iname í̠naga bi larigo mo wahalu Babilononaga kini kago andaneha holene hame nale harima. Anidagua birimago hondowa í̠na bi hongohe agali í̠naga biabe biaga biarunaga ne harigaha howa bule lalu latagi harigo biriya. Í̠na lalu, Waitigime ibalu homali bu karuha puwa inanaga kini homenerunaga kuni ngarubi ina mamalirunaga kuni ngarubi bibahende c 25dindini ba̱i̱na̱i̱ bima polebira lariya. Ai wali agali kuni áyu dindiha wiaruni nime dalu do gialalu mbiraga dindi guni ibira howa wiadambi halu biaga nga. Agali uruni tandaga timbuniore nalu howa homaga bini. Hina gari halu homenebi waitigime bayagola homenebi warago ko tararu ibalu bo homolenebi nga. 26Isaraele wali agalibi Yuda wali agalibi bibahendeme ko bialu heagome í̠naga anda í̠naga wali agali ti í̠ni kegoria kaware ibilonaga bu helarigo bo gialahole bu ngelo waharigoni áyu wiaabo kagoni ndobe.
27Anigo Anduane Homogo-o í̠naga dara holenewigo inahondo mo walia halu inahondo hendore dege bialu harigoni. 28Abale agali í̠naga biabe bia haga Mosesehondo latagi ha lari. Bi ogoni í̠na ibuhondo Isaraele wali agalinaga deni howa í̠naga bi mana gili bibe lalu lamiringi howa latagi hene. Í̠nime latagi halu lalu, d 29Áyu tí wali agali dewaore padamigoni. Anigo tígua i̱naga bi larogo hale naharimiyagua nde i̱na tí bo haeala togo lalu dindi tara tara ngaruha purogo lelolebero. Ani berogola wali agali emene daga lene dege ona holeberemi. 30Ai tíore wali agali mine hagaore bu kemigoni howa i̱naga bi larogo hale naholeberemida lo manda bido. Anigo tí dindi mendeyagi garabaya pu harimiyagua nde tígua mini beregedo holeberemi. 31Ani pu kemigola i̱ Anduane Homogo tínaga Ngode Datagaliwabeore kogo i̱na tínaga mini dungula halu hale paiho kemigo dugua halu berogola tígua i̱naga bi baya hanguore hale holeberemi. 32Tí dindi kaundia ogoniha pu howa tígua i̱ lone mitangi ho dai bialu i̱naga mini timbuni mini yaraga hene ngago yaraga halu holeberemi. 33Tíha mini ko mine holene ngago wahai halu mana ko biaga ngemigo wahalu buleberemigo irane tínaga mamaliru tigua Anduane Homogonaga bi mana lo wini ngago mo wahalu pialu hemiria bini ngaru manda biadai buleberemi. 34Ani manda bu kemigola i̱na tí lone haru dai bialu tíninaga dindi i̱na tí ngule lalu tínaga mamali Abarahamahondobi Aisagahondobi Yagabahondobi bi lo winigoria halimulo lone haru dai bulebero. Ani berogola dindi ogoni tínaga dindiore wialu tíni ogoniha howa wali agali emene áyu kadagua ndo palia timbu holeberemi. Ani howa mani wali agali lone palia emene naholebira. 35Ani bialu i̱na tí baba habo nalolene bi gahenge mbira wiaabobo bu ngelonaga lo wulebero. Ani bialu i̱ tínaga Ngode Datagaliwabe kogola tí i̱naga wali agali holeberemi. Ani bialu Isaraele wali agali tí dindi i̱na tí ngirugoria kemiru lone bo taliatagi naholebero, lene. e
Copyright information for
HUI